„Það þarf sterk bein til að standa af sér skítkastið“

„Kjarni málsins er að efri vörin krullast hjá samferðafólkinu sama hvað þú gerir. Hvort sem það er útlitið. Meðgangan. Holdarfarið. Grannur eða þéttur. Sílikon í vör eða flatbrjósta. Æfir mikið eða lítið. Borðar mikið eða lítið. Þeir finna sig knúna að lýsa yfir skoðun sinni og hreyta smánun í andlitið. Sumir fela sig bakvið lyklaborð, tölvuskjá eða snjallsímaforrit. Eða þekkja einhvern sem þekkir einhvern sem sagði eitthvað um einhvern.“

Þetta segir sálfræðingurinn og þjálfarinn Ragnhildur Þórðardóttir, betur þekktur sem Ragga Nagli, í nýjum pistli. Þar fer hún yfir umræður á kaffistofum, samfélagsmiðlum og í athugasemdakerfum fjölmiðla síðustu daga. 

„Ófrísk Crossfit keppandi sem jafnframt er doktor í verkfræði birtir myndband á instagrammi sínu þar sem hún rífur í járn af krafti komin vel á veg meðgöngu. Virkir í athugasemdum kreppa tær og munda fingurgómana á lyklaborðinu um að hún sé óábyrg móðir. Valdi barninu stórkostlegum skaða. Það muni fæðast með shaken baby syndrome.



Kona tekur þátt í fegurðarsamkeppni. Hún fær blammeringar um holdarfar sitt að vera þar sem uppfyllingarefni þar sem nálin á vigt hennar sé norðar en gengur og gerist í slíkum keppnum.

Konan sem krítíserar þessa breyttu staðla fegurðarsamkeppninnar er kölluð uppblásin Barbídúkka. Plastdúkka með sílíkonheila. Hún sé ekki með vitsmuni til að tjá sig.“

Ragga segir að besti mótleikarinn við þessu sé að halda sínu striki og láta slíkt sem vind um eyru þjóta.  

 

„Ef þú lætur það hafa áhrif á þig hafa lyklaborðsriddararnir fengið vald yfir þér og sigrað.

 

Hún hvetur lesendur sína til þess að velja sínar baráttur og að sannfæra sig um að sínar baráttur og ákvarðanir á hverjum tíma séu réttar.

„Það þarf sterk bein til að standa af sér skítkastið”