Kveðst hafa kveikt í bíl við Vog því hann komst ekki að í meðferð

Hæstiréttur hefur úrskurðað að maður sem kveikti í bifreið við sjúkrahúsið Vog og reyndi að kveikja í mottu í fjölbýlishúsi í Breiðholti í júlí síðastliðnum skuli áfram sæta gæsluvarðhaldi, eða til 15. september næstkomandi. Maðurinn hefur setið í gæsluvarðhaldi síðan þann 22. júlí.

Í greinargerð lögreglu segir að maðurinn hafi viðurkennt að hafa kveikt í bílnum við Vog og að hafa reynt að kveikja í gólfmottunni í fjölbýlishúsinu. Hafi hann ekki gefið neinar haldbærar skýringar á hegðun sinni aðrar en þær að hann hafi verið ósáttur við að fá ekki innlögn á Vog.

Að mati lögreglunnar hefði maðurinn getað stofnað til eldsvoða sem hefði haft í för með sér almannahættu þegar hann kveikti í bílnum og að mikil hætta hefði getað skapast hefði honum tekist að kveikja í mottunni í fjölbýlishúsinu.

„Sóknaraðili tekur fram að það sé mat lögreglu að um hafi verið að ræða tvö mjög alvarleg ásetningsbrot, framin með skömmu millibili, sem hefði getað stofnað til eldsvoða með ófyrirsjáanlegum afleiðingum bæði í tilviki bifreiðanna við sjúkrastofnunina [...] og að [...]. Það sé mat lögreglu að nauðsyn sé til að kærði sæti gæsluvarðhaldi á grundvelli almannahagsmuna þar sem hann sé undir sterkum grun um að hafa lagt eld að bifreið við [...] og anddyri að [...], þar sem fjöldi fólks sé í báðum húsunum og allt með ófyrirsjáanlegum afleiðingum.

Einnig sé það mat lögreglu að óeðlilegt sé að kærði gangi laus þar sem hann hafi framið gróf brennubrot/almannahættubrot og að réttarvitund almennings krefjist þess að sakborningur sæti gæsluvarðhaldi allt til að ákæra verði gefin út og dómur fellur vegna eðli brotsins,“ segir í greinargerð lögreglu en dóm Hæstaréttar má sjá hér.