Hér er eitt best geymda leyndarmál Heiðmerkur

Selgjá í jaðri Heiðmerkur gæti verið eitt best geymda leyndarmál Reykjavíkursvæðisins en þar hafa verið skráðar áttatíu fornminjar, sem vitna um búskaparhætti fyrri alda. Fjallað var um svæðið í fréttum Stöðvar 2 og í þættinum Ísland í sumar. 

Búrfellsgjá er vel þekkt og meðal vinsælli útivistarsvæða í nágrenni borgarinnar. Færri vita um aðra hrauntröð, sem gengur til norðvesturs í framhaldi af Búrfellsgjá. Hún heitir Selgjá, liggur samsíða Vífilsstaðahlíð, en þar var um aldir stundaður seljabúskapur frá ellefu bæjum á Álftanesi.

Ragnheiður Traustadóttir fornleifafræðingur hefur verið að skrá minjar í Selgjá fyrir Garðabæ. 

„Þessar minjar eru sérstaklega friðlýstar og ég held að ég sé búin að skrá áttatíu fornleifar inni í þessari gjá,“ segir Ragnheiður. 

Einn af hennar uppáhaldsstöðum er Þorsteinshellir, sem var nýttur sem fjárhellir. Þar hefur verið hlaðið í kringum innganginn og gerðar tröppur niður í hellinn. 

Þáttinn um Selgjá má sjá hér að neðan.