Undir áhrifum með stolna fartölvu í Álfheimum

Lögregla handtók par í bifreiðageymslu við Álfheima rétt um hálf 10 í gærkvöldi. Parið hafði komið sér fyrir í bílageymslunni og var nýbúið að nota fíkniefni þegar lögregla kom á vettvang. Þá var fólkið einnig ölvað að því er fram kemur í dagbók lögreglunnar á höfuðborgarsvæðinu.

Parið hafði jafnframt meðferðis ætlað þýfi, fartölvu, og var ákveðið að vista þau fyrir rannsókn máls í fangageymslu lögreglu.

Um hálf 7 í gærkvöldi var maður handtekinn í mjög annarlegu ástandi við Hlemm. Um tíu mínútum síðar var annar maður í annarlegu ástandi handtekinn í bifreiðageymslu við Mánatún. Mennirnir voru báðir vistaðir í fangageymslu lögreglu sökum ástands.

Þá var tilkynnt um par vera að brjótast inn í bifreiðar í Seljahverfi í nótt. Parið reyndist vera í annarlegu ástandi. Fólkið var handtekið og það vistað í fangageymslu fyrir rannsókn málsins.