Noble reyndi að lokka Gylfa til West Ham

Enn er beðið þess að staðfesting berist á því að Gylfi Þór Sigurðsson verði leikmaður Everton eins og allt bendir til þessa dagana.

Þeir Mark Noble, fyrirliði West Ham, og Kyle Walker, leikmaður Manchester City voru spurðir út í Gylfa fyrir leik æfingaleik liðanna hér á landi.

„Mér finnst hann frábær leikmaður. Toppleikmaður og ég hef spilað margoft gegn honum,“ sagði Noble sem rifjaði upp sögu af honum þegar West Ham var að vinna Swansea, 4-1, á síðasta tímabili.

„Ég veit ekki hvort ég megi segja frá þessu en ég sagði við hann - Gylfi, viltu koma til West Ham. Við gátum hlegið að þessu en hann var auðvitað ekkert allt of kátur miðað við stöðuna í leiknum,“ sagði hann.

„Það er alveg ljóst að það er sama hvaða félag það er sem fær hann, það er að fá algeran toppleikmann.“

Kyle Walker, var samherji Gylfa hjá Tottenham á sínum tíma og bar honum vel söguna.

„Fyrst og fremst, þvílíkur maður. Mjög auðvelt að umgangast hann, afar auðmjúkur og jarðbundinn. Hæfileikar hans inni á vellinum tala svo sínu máli, hann er frábær leikmaður.“

„Vinnusemi hans og dugnaður er fyrsta flokks. Ég óska honum alls hins besta, sama hvað hann ákveður að gera.“