Fótbolti

Segir íslensku stelpurnar frægar fyrir grófar tæklingar

Kolbeinn Tumi Daðason í Doetinchem skrifar
Sara Björk Gunnarsdóttir með boltann í leiknum gegn Frakklandi. Hún spilar með Vanessu Bernauer hjá Wolfsburg í Þýskalandi.
Sara Björk Gunnarsdóttir með boltann í leiknum gegn Frakklandi. Hún spilar með Vanessu Bernauer hjá Wolfsburg í Þýskalandi. Vísir/Vilhelm
Martina Voss-Tecklenburg, þjálfari Sviss, segir íslenska kvennalandsliðið vel hafa átt eitt til tvö rauð spjöld skilið í leiknum gegn Frakklandi í Tilburg á þriðjudaginn. Svissneskur blaðamaður spurði þjálfarann og tvo lykilmenn Sviss hvort þeir hefðu áhyggjur af grófum leik Íslands.

 „Íslendingar eru frægir fyrir grófar tæklingar og hefðu jafnvel getað fengið eitt til tvö rauð spjöld gegn Frakklandi,“ sagði Voss-Tecklenburg. Telja má líklegt að atvikin sem Voss-Tecklenburg eigi við séu tæklingar Sigríðar Láru Garðarsdóttur og Ingibjargar Sigurðardóttur í fyrri hálfleiknum.

 Vanessa Bernauer, samherji Söru Bjarkar Gunnarsdóttur hjá Wolfsburg, segir að mögulega ræði þær við dómarann fyrir leikinn varðandi þetta.

 „Það sem skiptir mestu máli er að vera sjálfar harðar og jafna það sem íslensku stelpurnar gera,“ sagði Bernauer. 

Vanessa Bernauer, Martina Voss-Teckelnburg og Ana-Maria Crnogorcevic.Vísir/Kolbeinn Tumi
Ana-Maria Crnogorcevic tók í svipaðan streng.

 „Við erum góðar í að taka við, en líka í að gefa,“ sagði miðvörðurinn og bætti við að liðið yrði að spila eins fast og dómarinn leyfði. 

 Þær voru spurðar út í stuðningsmenn Íslands sem vöktu athygli í leiknum gegn Frakklandi. Þær stöllur gáfu ekkert sérstaklega mikið fyrir stuðninginn, hann myndi ekki hafa áhrif á þær enda væru þær vanar miklum áhorfendafjölda frá leikjum Sviss á HM í Kanada fyrir tveimur árum.

 Bernauer fékk spurningu um samherja sinn, Söru Björk. Hún fór fögrum orðum um Söru, sagði hana hjartað í íslenska liðinu og það væri öllum augljóst hvað hún væri orkumikill leikmaður. 

EM 2017 í Hollandi

Mest lesið


Fleiri fréttir

Sjá meira


×

Mest lesið