Innhólfið hjá Frey fullt af fyrirspurnum um stelpurnar

Kolbeinn Tumi Daðason í Ermelo skrifar 24. júlí 2017 09:46

Elín Metta Jensen er 22 ára og hefur raðað inn mörkum fyrir Val í Pepsi-deild kvenna undanfarin sjö ár. Vísir/Tom

Freyr Alexandersson, landsliðsþjálfari Íslands, segir áhuga erlendra félagsliða á íslenskum landsliðsmönnum mikinn. Freyr vill fá fleiri íslenska leikmenn í stærstu deildir Evrópu en til þess þurfa þær að vera tilbúnar að færa fórnir.

Til stóð að blaðamenn fengju að ræða við hóp leikmanna landsliðsins á æfingasvæði liðsins í morgun. Freyr ákvað seint í gær að breyta þeim hittingi í fund með þjálfurum þar sem leikmenn þyrftu hvíld, jafnt líkamlega sem andlega.

Freyr fór um víðan völl í svörum sínum við spurningum blaðamanna. Til umræðu var meðal annars að Ísland þyrfti að eignast fleiri leikmenn í atvinnumennsku, þó ekki í meðal liðum í Noregi.

Upptöku frá fundinum má sjá neðst í fréttinni.

Fanndís Friðriksdóttir, lykilmaður í íslenska landsliðinu, spilar með Breiðablik á Íslandi.Vísir/getty

„Ég myndi vilja sjá fleiri leikmenn tilbúna að spila með bestu liðum Evrópu. Við verðum að hugsa stórt, sama þótt því geti fylgt vonbrigði,“ sagði Freyr á fundinum. Leikmenn verði að hafa þor í að hugsa stórt. „Það er ástæðan fyrir því að Sara Björk er að spila með Wolfsburg. Hún hefur ætlað sér það frá því hún var tólf ára.“

Ef litið er yfir leikmannahóp Íslands og hann borinn saman við hópa hinna landsliðanna fimmtán á EM er hópur Íslands einn sá slakasti miðað við þau félagslið sem leikmenn spila með. Freyr segir hóp Íslands einn af þremur lélegustu hvað þetta varðar.

Til samanburðar spilar allt byrjunarlið Austurríkis í þýsku úrvalsdeildinni, leikmenn Sviss spila í mjög sterkum liðum og Frakkar spila lang flestir í frönsku deildinni. Lyon og PSG í Frakklandi mættust í úrslitaleik Meistaradeildar Evrópu. En hvers vegna erum við ekki með fleiri leikmenn í sterkari deildunum?

Sif Atladóttir hefur verið í atvinnumennsku í Svíþjóð frá árinu 2010.Vísir/Tom

„Þú þarft að fórna ákveðnum hlutum til að komast út. Fyrstu skrefin eru þung fjárhagslega. Þú færð ekki góðan samning fyrst, þarft að skrimta,“ sagði Freyr. Íslensku leikmennirnir hafi það gott hjá félögunum á Íslandi.

„Þær geta búið hjá foreldrum sínum og eru í aukavinnu með,“ sagði Freyr. Aðstaðan heima sé fín og þjálfarar fínir. Samt ekkert í líkingu við aðstöðuna hjá stóru félögunum úti í heimi.

„Við græðum ekkert á miðlungsklúbbum í Noregi,“ sagði Freyr og vill stelpurnar í topp fimm lið í Svíþjóð, í vaxandi deildir Englands og Spánar eða þá frönsku eða þýsku deildina. Jafnvel þá bandarísku.

Þá var Freyr spurður út í kínversku deildina þar sem Sigurður Ragnar Eyjólfsson, fyrrverandi landsliðsþjálfari, þjálfar. Sigurður Ragnar vildi fá Dagnýju Brynjarsdóttur í liðið í vetur. Hún endaði á að afþakka boðið og í framhaldinu tókust Freyr og Sigurður Ragnar á í fjölmiðlum. Sigurður Ragnar taldi Frey standa í vegi fyrir að Dagný færi út.

Dagný Brynjarsdóttir leikur með Portland í bandarísku atvinnumannadeildinni.vísir/getty

„Ef það hentar leikmanninum þá er það allt í lagi. Ég veit ekki hvort deildin sé jafngóð og þessar sem við erum að tala um,“ sagði Freyr og bætti við að erfitt væri að fylgjast með kínversku deildinni.

Fyrst og fremst þyrfti fórnfýsi hjá leikmönnum að ætla sér út, sama hvað það kosti þótt fleiri þættir spili inn í.

„Ég veit samt að það er áhugi á íslenskum leikmönnum,“ sagði Freyr. „Ég er með ansi mörg e-mail sem þarf að svara.“

Aðspurður hvaða leikmönnum hafi verið sýndur áhugi sagði Freyr það í raun vera alla leikmenn sem væru ekki þekktar stærðir fyrir. Hann nefndi engin nöfn en telja má líklegt að Agla María Albertsdóttir, Ingibjörg Sigurðardóttir og Sigríður Lára Garðarsdóttir séu meðal þeirra sem fyrirspurnum rignir inn um.

EM 2017 í Hollandi

Tengdar fréttir

Mest lesið

Fleiri fréttir