Bolirnir seldust upp og gott betur en það

Það var líf og fjör í versluninni AndreA á Laugavegi á fimmtudaginn þegar Konur eru konum bestar-bolirnir fóru í sölu. Teymið á bak við verkefnið er afar ánægt með viðbrögðin sem bolirnir vöktu.

„Við erum ekkert smá þakklátar með viðtökurnar. Það eru greinilega rosalega margir sem tengja við þetta málefni því bolirnir seldust upp. Við náðum að panta 100 boli til viðbótar sem komu bara í miðju partíi,“ segir Elísabet Gunnarsdóttir, ein kvennanna á bak við verkefnið, en í upphafi létu þær útbúa 100 boli og bættu svo við helmingi fleiri bolum á síðustu stundu.

„Svo erum við líka með langan lista af fólki sem vill fá boli þannig að við látum gera fleiri. Við viljum auðvitað að sem flestir beri þessa setningu framan á sér og hjálpi okkur að dreifa boðskapnum. Og strákar geta líka klæðst bolunum, maðurinn minn er t.d. kominn með bol.“

Bolirnir kosta 5.900 krónur og allur ágóðinn rennur til Kvennaathvarfsins. Það er því ljóst að með verkefninu mun hópurinn láta ansi gott af sér leiða.

Ljósmyndari Vísis var á svæðinu í veislunni. Hægt er að fletta myndum úr henni í myndasafninu hér fyrir neðan.