Kjötið selt sem vistvænar unghænur

Nokkur fyrirtæki hafa þegið boð forsvarsmanna Brúneggja um að skoða aðstæður á búum fyrirtækisins áður en þau taka endanlega ákvörðun um að hætta viðskiptum við fyrirtækið með öllu. Hætti þeir viðskiptum verður hluta af stofninum slátrað. Brúnegg hefur selt varphænur sínar sem vistvænar unghænur. Engu var slátrað frá fyrirtækinu til manneldis árið 2015, þegar afskipti Matvælastofnunar af rekstrinum voru sem mest, en á fimmta þúsund fuglum á þessu ári.

Kristinn Gylfi Jónsson, einn eigenda Brúneggja, segir það smá glætu í tilverunni að viðskiptavinir ætli að skoða aðstæður, í ljósi þess að allir kaupendur að vörum þeirra hafa hætt viðskiptum við fyrirtækið.

Spurður um hvort Brúnegg hafi stóran lager af eggjum sem nú er óseljanlegur, eða að framleiðsla fyrirtækisins safnist einfaldlega fyrir á næstu dögum og vikum, svarar Kristinn því til að fyrirtækið hafi til þessa ekki annað eftirspurn.

„Við eigum því engan lager og þurfum engu að farga. Við þurfum ekki heldur að taka afstöðu til þess á næstu dögum hvort þarf að gera slíkt. Slík vandamál eru ekki komin upp. Í lengstu lög reynum við að komast hjá því að farga afurðum frá okkur,“ segir Kristinn en flestir eggjaframleiðendur reyna að eiga einnar til tveggja vikna lager. Hann bætir við að áform um að taka nýtt hús fyrirtækisins í notkun á næstu dögum hafi ekkert breyst. „Við erum að leggja niður elsta hlutann af búinu okkar á Teigi í þessari viku. Við gerum það eins og sakir standa núna en framtíðin verður að leiða í ljós hvort það er rétt ákvörðun,“ segir Kristinn en í nýja varphúsinu verða 4.000 til 4.500 fuglar.

Þegar spurt er um stöðuna þegar fram líður, og ef ekki tekst að endurnýja fyrri viðskiptasambönd, telur Kristinn aðeins um eitt að ræða. „Þá slátrum við úr stofninum hjá okkur. Við erum með mjög stóran stofn enda vorum við með 18 til 20% markaðshlutdeild. Þannig að það er kannski fimmta hver hæna í landinu,“ segir Kristinn en vill ekki gefa nánari upplýsingar um varp­stofn Brúneggja, framleiðslutölur eða hvernig staðið verður að slátrun komi til slíkra aðgerða.

„Oft er hænum slátrað og viðurkenndar aðferðir eru til þess. Þær eru seldar sem unghænur kannski, við höfum gert það aðeins í gegnum tíðina,“ segir Kristinn þó, sem greindi frá því í viðtali við Bændablaðið í september 2014 að eftir að þeirra fuglar ljúka varptíma sínum „er þeim slátrað og höfum við reynt að nýta allt kjöt sem til fellur. Við höfum slátrað þeim hjá Ísfugli og selt sem vistvænar unghænur. Það er fugl sem er ekki eldaður eins og venjulegur kjúklingur, hann þarf mun meiri eldun og er til að mynda vinsæll í austurlenska matargerð.“ 

Fréttin birtist fyrst í Fréttablaðinu