Glódís Perla: Verður veisla ef allir mæta á völlinn

Glódís Perla Viggósdóttir, miðvörður íslenska kvennalandsliðsins í fótbolta, setur stefnuna á að klára dæmið á föstudaginn gegn Slóvenum og tryggja farseðilinn á þriðja Evrópumeistaramótið í röð.

Glódís Perla er búin að vera mögnuð í vörn Íslands sem á enn eftir að fá á sig mark í sex leikjum í undankeppninni. Stelpurnar eiga leik gegn Slóveníu á föstudaginn og Skotlandi á þriðjudaginn. Íslenska liðið er á toppnum með fullt hús stiga.

„Við erum búnar að standa okkur rosalega vel og erum búin að ná okkar markmiðum hingað til. Við eigum eitt markmið eftir sem er að vinna riðilinn og ná þessu stigi til að tryggja okkur alla leið. Það er næst á dagskrá hjá okkur,“ segir Glódís í samtali við Vísi en stelpurnar æfðu í fyrsta sinn á Laugardalsvelli í morgun.

Allar að róa í sömu átt

Ísland pakkaði Slóveníu saman, 6-0, þegar liðin mættust ytra en slóvensku stelpurnar eru í þriðja sæti riðilsins með níu stig.

„Þær eru með rosalega góða einstaklinga og eru gott sóknarlið. Á móti eru þær ekki með gott varnarlið. Við náðum að brjóta þær í síðasta leik þar sem við áttum topp leik. Þess vegna unnum við 6-0 en samt er þetta liðið sem skapaði flest marktækifæri á móti okkur,“ segir Glódís sem er ánægð með framfarir liðsins undanfarin misseri.

„Það hefur verið rosalega gaman að vera hluti af þessu. Okkur hefur gengið rosalega vel enda erum við allar að róa í sömu átt. Okkar markmið eru skýr og þegar allir stefna að því sama þá bætir liðið sig leik fyrir leik.“

Kannski opnast gluggar

Glódís spilar með Eskilstuna í Svíþjóð sem átti gott tímabil í fyrra og hafnaði í öðru sæti á eftir Söru Björk Gunnarsdóttur og fyrrverandi stöllum hennar í Rosengård. Nú er Eskilstuna í fjórða sæti.

„Þetta hefur ekki gengið alveg eins vel og í fyrra og því hefur þetta verið aðeins erfiðara. Hópurinn okkar breyttist mjög mikið. Eins og er þá erum við í fjórða sæti og við eigum ekki möguleika á að vinna. Við setjum stefnuna á þriðja sætið,“ segir Glódís brosmild að vanda, en gæti þetta verið síðasta leiktíðin hennar hjá liðinuÐ

„Eins og er þá er ekkert í gangi. Ég er bara að einbeita mér að þeim verkefnum sem liggja fyrir núna eins og að spila með landsliðinu. Svo erum við í Meistaradeildinni sem verður gaman og þar kannski opnast einhverjir gluggar. Það kemur bara í ljós hvað gerðist,“ segir Glódís Perla Viggósdóttir.

Allt viðtalið má sjá í spilarann hér að ofan.