Pallíettujakkinn verður notaður meira

Þura Stína Kristleifsdóttir, plötusnúður og grafískur hönnuður, er mjög upptekin í vinnu og verkefnum þessa dagana en hún segir að þeir sem þekki hana viti að þannig líði henni best.

„Ég fór á Evróputúr sem plötusnúður Reykjavíkurdætra í sumar og var að koma úr mjög spennandi þróunarverkefni sem ég vann í sumar með vöruhönnuðum aðallega, þar sem við einblíndum á verðmætasköpun fyrir íslenskt hráefni og samstarf á milli hönnuða og fyrirtækja. Í seinustu viku byrjaði ég svo á stórkostlegu auglýsingastofunni Brandenburg og er mjög spennt fyrir komandi tímum þar.“

Hvaða flík notar þú mest? Ég hef alltaf verið mikill aðdáandi Monki buxna enda ótrúlega þægilegar. Þessa dagana er ég að vinna mikið með einar slíkar uppháar, smá „loose“ og ekki alveg 100% svartar.

Hver er uppáhalds yfirhöfnin? Síð svört kápa frá Weekday sem ég keypti mér í Danmörku í sumar, ég hef ekki getað notað hana neitt ofboðslega mikið sökum góðs veðurs en bíð spennt eftir haustinu.

Hvaða skór eru í mestu uppáhaldi? Þegar ég spila þá stend ég oftast í lengri tíma, ég hef átt mjög marga þægilega strigaskó í gegnum tíðina en þeir eru eiginlega allir Nike.

Hvaða skartgripi notar þú mest? Ég er nánast alltaf með úr og hef alltaf átt hringi. Ég er mjög léleg að nota skartgripi í dag en á einn „alvöru“ hring sem ég fékk í stúdentsgjöf 19 ára frá æskuvinkonum mínum. Án þess að vera neitt sérstaklega hjátrúarfull þá set ég hann alltaf upp þegar ég er að fara að gera eitthvað mikilvægt eða þegar mér veitir ekki af smá heppni.