Kosningavakt Stöðvar 2 í heild sinni

Kosningavakt Stöðvar 2 heldur áfram að loknum kvöldfréttum og íþróttum. Þangað mæta Guðni Th. Jóhannesson, Halla Tómasdóttir, Davíð Oddsson, Andri Snær Magnason, Sturla Jónsson og Elísabet Jökulsdóttir í myndver þar sem farið verður yfir kosningabaráttuna og horfur til embættisins.

Einnig verður farið í kosningapartý víðsvegar um borgina, rætt við stuðningsmenn frambjóðenda og þá koma stjórnamálafræðingar og skýra gang mála. Von er á fyrstu tölum á ellefta tímanum í kvöld og verður fréttastofa með þær í beinni útsendingu ásamt viðbrögðum frambjóðenda við þeim.

Hægt verður að fylgjast með kosningavaktinni hér á Vísi í spilaranum fyrir ofan. 

Uppfært kl. 23:20. Útsendingunni er nú lokið en upptökur af henni má finna í nokkrum hlutum hér fyrir neðan.

Í fyrsta hluta er rætt við Baldur Þórhallsson stjórnmálafræðing og Höskuld Kára Schram fréttamann. Einnig er kíkt á aðstandendur og stuðningsmenn Höllu Tómasdóttur.

Í öðrum hluta komu frambjóðendurnir Halla Tómasdóttir og Guðni Th. Jóhannesson í viðtal.

Þá var kíkt í kosningamiðstöð Guðna Th. þar sem aðstandendur framboðsins voru teknir tali. Stjórnmálafræðingarnir Baldur Þórhallsson og Eva Heiða Önnudóttir spá síðan í spilin.

Sýnt er frá því þegar frambjóðendur kusu fyrr um daginn og kíkt er í kosningamiðstöðvar Davíðs Oddssonar og Andra Snæs Magnasonar.

Í þriðja hluta komu Friðjón Friðjónsson, talsmaður í kosningabaráttu Guðna Th. Jóhannessonar, Grímur Atlason, kosningastjóri Andra Snæs Magnasonar og Óli Björn Kárason, sem hefur komið að kosningabaráttu Davíðs Oddssonar, í viðtal.

Einnig var kíkt í útskriftarveislu í húsnæði Veðurstofu Íslands hjá Ingu Maríu, sem var að útskrifast úr hjúkrunarfræði. Þá var einnig viðtal í beinni frá Annecy í Frakklandi þar sem Guðmundur Hilmarsson, blaðamaður Morgunblaðsins, sagði frá því hvernig Íslendingarnir í Frakklandi gátu kosið í gær.

Loks komu frambjóðendurnir Davíð Oddsson og Andri Snær Magnason í viðtal.

Í fjórða hluta er kíkt í Ráðhús Reykjavíkur þar sem starfsfólk kjörstjórnar var í óðaönn að hringja á kjörstaði að finna út úr því hver kjörsóknin er.

Þá var litið inn í útskriftarveislu Ingunnar Árnadóttur sem útskrifaðist úr lögfræði. Einnig var bútur úr seinni kappræðunum sem haldnar voru á Stöð 2 spilaður. Einnig voru svör frambjóðenda um fyrstu verk sín í embætti rifjuð upp og Eiríkur Bergmann og Hulda Þórisdóttir ræða stöðu mála.

Þá mæta Sturla Jónsson og Elísabet Jökulsdóttir frambjóðendur í viðtal.

Í fimmta hluta byrja tölur að berast úr hinum ýmsu kjördæmum og við heyrum fyrstu viðbrögð frambjóðenda.