Ný könnun MMR: Guðni með 60 prósent

Guðni Th. Jóhannesson, sagnfræðingur og forsetaframbjóðandi, hefur afgerandi forystu meðal forsetaframbjóðenda samkvæmt nýrri könnun MMR. Guðni mælist með 59,2 prósent fylgi en fylgi Ólafs Ragnars Grímssonar hefur minnkað um rúmlega 27 prósentustig frá síðustu könnun og mælist nú 25,3 prósent.

Þá hefur fylgi Andra Snæs Magnasonar rithöfundar minnkað um tuttugu prósent frá síðustu könnun og mælist nú 8,5 prósent. Aðrir frambjóðendur njóta mun minna fylgis og mælast samanlagt með rúmlega sex prósent.

Könnunin var framkvæmd dagana 6. til 9. maí og var heildarfjöldi svarenda 947 einstaklingar. Davíð Oddsson, fyrrverandi forsætisráðherra, mælist með 3,1 prósent í nýju könnuninni en hann tilkynnti um framboð sitt í gær, þegar ¾ hluta gagnaöflunarinnar var lokið. 11,5 prósent þeirra sem spurðir voru eftir að Davíð tilkynnti um framboðið sögðust myndu kjósa hann.

Halla Tómasdóttir fjárfestir mælist með 1,7 prósent og aðrir frambjóðendur með samtals 1,9.