Vonar að forsætisráðherra bregðist við áður en vantrauststillaga verði lögð fram

Helgi Hrafn Gunnarsson, þingmaður Pírata, segist binda vonir við að Sigmundur Davíð Gunnlaugsson forsætisráðherra bregðist við áður en lögð verði fram vantrauststillaga á hendur honum. Það eina rétta í stöðunni sé að hann segi af sér.

„Að sjálfsögðu ætti hann að segja af sér. Að sjálfsögðu. Ég held að í öllum þroskuðum lýðræðisríkjum að þá myndi hann segja af sér, að sjálfsögðu. Mér finnst það furðulegt að það sé einhver vafi um það," segir Helgi Hrafn í samtali við Vísi.

Allir stjórnarandstöðuflokkarnir á Alþingi hafa rætt vantrauststillögu á Sigmund Davíð vegna upplýsinga um að eiginkona hans, Anna Sigurlaug Pálsdóttir, eigi verulegar eignir inni í félaginu Wintris, sem skráð er á Bresku jómfrúreyjunum. Flokkarnir hafa þó ekki rætt saman formlega um sameiginlega vantrauststillögu en hyggjast krefjast svara um málið eftir páska.

„Það skiptir máli hvernig á svona málum er haldið. Tímasetningar skipta máli. Hvernig umræðan þróast skiptir máli og hvað kemur í ljós núna á næstu vikum á meðan þingið er ekki að störfum. Það yrði fyrst hægt að leggja fram vantrauststillögu, ef það verður ákveðið að gera það, eftir tvær vikur. En auðvitað hlýtur allt samfélagið að vera að tala um vantrauststillögu, allt samfélagið að tala um að þetta sé ekki boðlegt," segir Helgi, sem gagnrýnir það harðlega að Sigmundur hafi ekki upplýst um þessi mál.

„Það er ekki eins og hann hafði ekki haft tækifæri til að upplýsa þetta. Þetta var eitt af aðalmálunum í kosningabaráttunni 2013. Þetta er stóra málið þeirra,  það er allt í kringum þessa kröfuhafa. Maður hefði haldið að það væri eðlilegt að þetta kæmi fram."

Helgi segir mikilvægt að forsætisráðherra bregðist við sem fyrst. „Það sem ég á erfitt með að verði tilfellið er að þetta mál einhvern veginn fái bara að vera þarna og að það komi engin vantrauststillaga fram og forsætisráðherra sitji bara áfram á vantrauststillögu. Mér finnst þær aðstæður fáránlegar, ég trúi því ekki að það verði endirinn. En maður þarf líka að gefa honum smá færi á því að hugsa sinn gang á þessum tveimur vikum. Ef menn fara núna til tilbreytingar að bregðast rétt við svona hlutum þá náttúrulega á ekkert að þurfa einhverja vantrauststillögu frá minnihlutanum," segir Helgi Hrafn, en ekki náðist í Sigmund Davíð við vinnslu fréttarinnar.