Hvar er Nonni?

Árið 1863 lagði Jón Hjaltalín landlæknir fram frumvarp á Alþingi um stóran spítala sem þjóna skyldi öllu landinu. Málið velktist í kerfinu á milli embættismanna í nokkra áratugi. Landspítalinn tók ekki til starfa fyrr en tæplega 70 árum síðar. Spítalaþörfinni var mætt með skammtímalausnum og bráðabirgðahúsnæði. St. Jósefssystur björguðu reyndar málum og byggðu Landakotsspítala rétt eftir aldamótin 1900 fyrir söfnunarfé frá Frakklandi. Rithöfundurinn og presturinn, Jón Sveinsson (Nonni), átti frumkvæði að þeirri byggingu enda ofbauð honum úrræðaleysi íslenskra stjórnvalda.

Landspítalinn við Hringbraut hefur um árabil verið munaðarlaus. Menn eru sammála um að úrbóta og nýbygginga sé þörf en enginn tekur af skarið. Deilt er um staðsetningu og framtíð spítalans. Árin líða og húsin drabbast niður enda tilgangslaust að gera við það sem kannski verður rifið. Þjóðin rífst af venjulegum tilfinningahita og yfirborðskenndri þekkingu um skipulag og stefnumótun heilbrigðismála. Samfélagsmiðlarnir bjóða uppá frjáls skoðanaskipti um málið. Ekki er þverfótað fyrir sérfræðingum í spítalabyggingum. Meðan þessar deilur blómstra eins og sóleyjar í hlaðvarpa er ríkisvaldið stikkfrí. Spítalinn er í fjársvelti og hægt að eyða peningum í annað.

Nú er talað um að flytja spítalann frá Hringbraut upp að Vífilsstöðum. Einhverjir horfa á Korpúlfsstaðalandið. Íslenskir læknar á Norðurlöndum hafa velt upp þeirri hugmynd að flytja spítalann til Noregs. Þar eru læknarnir og hjúkunarliðið og fjöldi stórhuga íslenskra athafnamanna og verktaka sem gætu fleygt upp einum spítala í hendingskasti. Allt bendir til þess að aftur muni takast að fresta öllum framkvæmdum um 70 ár. Gamlir aðdáendur Nonna og Manna spyrja með tárin í augunum: Getur enginn bjargað okkur úr klóm ósvífinna stjórnmálamanna og annarra besserwissera? Hvar er Nonni?