Van Gaal: Rashford spilaði stórkostlega

Hinn 18 ára Marcus Rashford skaust upp á stjörnuhimininn þegar hann skoraði tvö mörk í 5-1 sigri Manchester United á Midtjylland í seinni leik liðanna í 32-liða úrslitum Evrópudeildarinnar í gær.

Rashford kom óvænt inn í byrjunarlið United fyrir Anthony Martial og gerði sér lítið fyrir og skoraði tvívegis, í sínum fyrsta aðalliðsleik fyrir félagið. Mörkin hans má sjá hér að neðan.

Louis van Gaal, knattspyrnustjóri United, var ánægður með frammistöðu sinna manna í gær og hrósaði Rashford sérstaklega.

„Þetta var frábær frammistaða en þú verður að sýna stöðugleika.

„Við erum að leita að stöðugum framherja, og það eru ekki margir slíkir í bransanum, en hann spilaði stórkostlega,“ sagði Hollendingurinn sem býst ekki við að Martial verði lengi frá vegna meiðslanna sem hann varð fyrir í upphituninni fyrir leikinn gegn dönsku meisturunum.

„Þetta virðist ekki vera alvarlegt. Hann er þreyttur því hann er bara tvítugur og hefur spilað alla leikina á tímabilinu,“ sagði Van Gaal um meiðsli Frakkans.