70 þúsund króna sekt fyrir ranga sokka

Slóvenska handknattleikssambandið þarf að greiða um 70 þúsund krónur í sekt þar sem að leikmaður braut reglur um búninga á EM í Póllandi.

Dean Bombac, leikmaður slóvenska liðsins, klæddist svörtum sokkum í leik liðsins gegn Svíþjóð en aðrir voru í hvítum sokkum.

Svíar unnu leikinn en Slóvenar komust á blað með því að gera jafntefli við Spánverja í gær, 24-24. Slóvenía er þó neðst í riðlinum með eitt stig og má ekki tapa gegn Þýskalandi í lokaumferð riðlakeppninnar á morgun.