Aron: Aldrei verið eins vel stemmdur fyrir stórmóti

„Það er ekkert að plaga mig núna. Ekki enn þá,“ segir Aron Pálmarsson og glottir en hann kom til móts við landsliðið verkjalaus að þessu sinni og verður því væntanlega í sínu besta formi á EM. Hann spilar sinn 100. landsleik gegn Portúgal í kvöld og það á sínum gamla heimavelli í Hafnarfirði.

Hann hefur talsvert verið að glíma við meiðsli á síðustu árum og álagið í Þýskalandi tók sinn toll. Það er ekki sama álagið í Ungverjalandi og það gerir honum gott.

„Það er orðið svolítið síðan ég kem svona verkjalaus inn í liðið fyrir stórmót en það þarf að fylgjast vel með mér. Ég veit ég er bara 25 ára en líkaminn minn er ekki alveg gerður fyrir svona mikið álag. Við þurfum því að halda vel utan um þetta,“ segir Aron en hann var einmitt í sjúkraþjálfun er viðtalið var tekið. Honum líður eðlilega vel með að fara svona inn í stórmót.

„Ég hef aldrei verið svona vel stemmdur fyrir stórmóti. Í það minnsta ekki síðan fyrir Ólympíuleikana 2012. Ég hef æft vel sjálfur og fékk kærkomið jólafrí loksins þannig að ég er alveg hrikalega spenntur fyrir þessu.“

Margir höfðu á orði er Aron fór til Veszprém að það gæti reynst landsliðinu vel en sjálfur var hann lítið að hugsa um það.

„Ég hugsaði lítið um það en sé það núna eftir á að þetta er gott fyrir mig. Ég mun leggja mitt af mörkum í þessu móti og spila eins mikið og ég get. Nema ég geti ekkert. Þá verð ég að setjast á bekkinn," segir Aron en hvað er Ísland að fara langt á þessu móti?

„Við erum auðvitað að stefna á þetta Ólympíusæti. Þegar maður er kominn af stað vill maður auðvitað fara eins langt og hægt er. Það er talað um að fimmta sætið muni duga. Við náðum því síðast með laskað lið og það var toppárangur. Markmið eitt er að ná ÓL-sætinu og svo vinnum við okkur út frá því.“