Albönsku fjöl­skyldurnar hlakka mikið til að koma aftur til Ís­lands

Albönsku fjölskyldurnar tvær sem fengu íslenskan ríkisborgararétt í desember síðastliðnum munu koma hingað til lands næstkomandi þriðjudag.

Þær fljúga frá Albaníu til London á mánudag, gista þar í eina nótt og koma svo til Íslands daginn eftir. Að sögn Hermanns Ragnarssonar sem aðstoðað hefur fjölskyldurnar er flugið frá London í boði flugfélagsins WOW air.

Í báðum fjölskyldum eru langveik börn, þeir Kevi, sem er með ólæknandi slímseigjusjúkdóm, og Arjan, sem er með hjartagalla. Það vakti vægast sagt mikla reiði í samfélaginu þegar þeir voru sendir úr landi ásamt fjölskyldum sínum þar sem mörgum blöskraði að langveik börn væru send úr landi, og það til Albaníu þar sem afar umdeilt er hvort heilbrigðiskerfið geti veitt drengjunum þá þjónustu sem þeir þurfa.

„Fjölskylda Arjan er komin með íbúð á Ásbrú í Reykjanesbæ og fjölskyldufaðirinn er kominn með vinnu hjá verktaka í bænum. Fjölskylda Kevi er svo komin með íbúð í miðbæ Reykjavík. Pabbi hans verður svo í vinnu hjá mér til að byrja með en svo fara þau foreldrarnir væntanlega fljótlega á íslenskunámskeið þar sem þau tala hvorki ensku né íslensku,“ segir Hermann og bætir við að hann fái að vita annað hvort í dag eða á morgun með leikskólapláss fyrir börnin.

Gaf 700 þúsund krónur í söfnunina

Aðspurður hvernig söfnunin fyrir fjölskyldurnar hafi gengið segir Hermann að hún hafi gengið vel.

„Það hafa safnast um 4,5 milljónir króna en það er auðvitað mikill kostnaður sem fylgir því að koma átta manna fjölskyldu til landsins og svo kostar að koma sér fyrir hér. Flugið frá Albaníu til London og nóttin á hóteli kostar til dæmis rúma milljón. Svo komast þau ekki inn í kerfið hér hvað varðar læknisþjónustu fyrr en efir sex mánuði, borga fyrir íslenskunámskeiðin og fylla íbúðirnar af húsgögnum,“ segir Hermann.

Mjög margir lögðu til pening í söfnunina.

„Fólk var að leggja inn allt frá 1000 krónum og upp í 30 þúsund. Svo voru nokkrir sem settu 50 þúsund og 100 þúsund og svo var einn einstaklingur, bara venjulegur maður eins og ég og þú, sem lagði inn 700 þúsund.“

Hermann segir að fjölskyldurnar hafi haft það fínt í Albaníu en að þær hlakki mikið til að koma til Íslands.

„Hann Kevi litli er reyndar búinn að vera veikur og þarf líklegast að fara á sjúkrahús um leið og hann kemur hingað. Það eru bara þessi veikindi hjá honum sem eru að hrjá hann,“ segir Hermann.