Útgerðarmenn segja til greina koma að draga einhverjar kröfur í land

Lítið hefur miðað í samningsátt í kjaraviðræðum sjómanna við útgerðina, og íhuga sjómenn nú að grípa til verkfallsaðgerða á næsta ári. Haukur Þór Hauksson, aðstoðarframkvæmdastjóri Samtaka fyrirtækja í sjávarútvegi (SFS), segir ljóst að báðir aðilar þurfi að draga úr kröfum sínum svo hægt verði að ná fram raunhæfum samningum.

„Við erum tilbúin til að setjast niður og halda áfram að ræða málin með það að markmiði að ná samkomulagi. Til þess held ég að aðilar verði að vera tilbúnir til að ræða saman á yfirvegaðan hátt um þessi atriði sem standa út af. Þannig að við vonumst auðvitað til þess að ekki komi til verkfalla, bara að samningaleiðin nái fram að ganga. En þeir hafa finnst mér verið yfirlýsingaglaðir á síðustu dögum. Við höfum sannarlega tekið eftir því,“ segir Haukur.

Staðan stirð

Sjómenn hafa verið samningslausir í um fimm ár. Deiluaðilar hafa reglulega sest við samningaborðið á þeim tíma en viðræður hófust fyrir alvöru nú í haust. Valmundur Valmundsson, formaður Sjómannasambands Íslands, sagði í samtali við Vísi í gær að erfiðlega hafi gengið að ræða við samninganefndina. Kröfur SFS væru með öllu óásættanlegar, en úr viðræðunum slitnaði í byrjun desembermánaðar.

„Okkur hefur að sama skapi fundist skorta það að vilji sé til að ræða á yfirvegaðan hátt um efnisatriði málsins. Þetta er klárlega stirt eins og staðan er núna en við verðum bara að bíða og sjá, ræða þetta okkar á milli og sjá hvernig rétt er að bregðast við og haga framhaldinu,“ segir Haukur.

Sjá einnig: Sjómenn vilja láta sverfa til stáls

Þurfa að mætast á miðri leið

Aðspurður segir hann koma til greina að draga einhverjar kröfur í land – en að sjómenn þurfi að gera slíkt hið sama. „Eins og í öllum samningum held ég að hvorugur aðili fái allar sínar kröfur í gegn og við áttum okkur aleg á því. En við nálgumst málið bara með þeim hætti þegar báðir aðilar eru tilbúnir til að ræða það að hittast einhvers staðar á miðri leið í ákveðnum málum til að ná einhverjum fleti. Þá erum við tilbúin til að skoða það allt saman. Það er erfitt að ná samningum ef hvorugur aðili ætlar að gefa tommu eftir.“

Gert er ráð fyrir að afstaða sjómanna til mögulegra verkfallsaðgerða liggi fyrir um miðjan janúar og gætu þeir þá gripið til aðgerða í mars. Haukur segist binda vonir við að málin leysist sem fyrst.

„Ef það er niðurstaða manna að grípa til slíkra aðgerða þá verður maður auðvitað bara að spila eftir því eða bregðast við ef svo liggur fyrir. En auðvitað vonum við að ekki komi til þess og teljum að það sé hægt að leysa málin án þess að fara út í slíkar aðgerðir, en það er auðvitað þeirra að ákveða það.“