Audi kraftabílastóð í LA

Audi hefur látið uppi að fyrirtækið muni sýna þrjá af ofurbílum sínum á bílasýningunni í Los Angeles sem hefst í næstu viku og hafa allir þessir bílar fengið nýlegar breytingar og eru öflugri en nokkru sinni.

Þetta eru bílarnir Audi R8 með 610 hestafla og 10 strokka vél, Audi RS7 Performance með 8 strokka og 605 hestafla vél og Audi S8 Plus með sömu 605 hestafla vél. Þarna verða því samankomin 1.820 hestöfl í þremur Audi bílum af stærri gerðinni. Eitthvað sem ætti að falla vel í kramið hjá hestaflaóðum og nú kaupóðum Bandaríkjamönnum, sem aldrei hafa keypt annað eins af bílum og í ár og á aldrei hærra meðalverði.

Audi RS7 bíllinn er litlar 3,7 sekúndur í hundraðið þrátt fyrir að vera fremur stór bíll og ekki er nú Audi S8 Plus minni og hann klárar sprettinn á 3,8 sekúndum. Það sem Audi S8 Plus hefur fengið umfram hefðbundinn S8 er ný loftpúðafjöðrun, nýtt stýrikerfi, keramik bremsur, pedala úr ryðfríu stáli og uppfært innra útlit þar sem leðursætin eru stöguð með rauðum þráði.