Salka stofnar de la Sól

Tónlistakonan Salka Sól Eyfeld hefur stofnað félagið de la Sól ehf. samkvæmt því sem fram kemur í Lögbirtingablaðinu. Salka segist hafa stofnað félagið utan um sjálfa sig þar hún starfi sem verktaki á mörgum vígstöðvum.

Í Lögbirtingablaðinu kemur fram að tilgangur félgsins sé opinber flutningur tónlistar, útgáfa tónlistar, talsetning inn á sjónvarpsefni og auglýsingar, markaðsetning á vörum fyrir þriðja aðila, lánastarfsemi og önnur sú starfsemi sem stjórn félagsins ákveður hverju sinni.

Salka segir að mikið sé framundan hjá sér enda Iceland Airwaves hafið þar sem hún er að spila. Þá muni hún halda áfram að vinna upp í Þjóðleikhúsi en Salka vann tónlistina við leikritið um Hróa hött. Einnig sé mikil jólatörn framundan eins og hjá fleiri tónlistamönnum.

„Ég sé ekki fram á mikið frí, en þetta er gaman,“ segir Salka.