Nýr Nissan Qashqai á sextíu og tveggja sekúndna fresti

Aldrei hafa jafn margir bílar verið framleiddir í Bretlandi á jafn skömmum tíma og gerðist í bílaverksmiðju Nissan í Sunderland í dag, fimmtudag, þar sem sportjeppinn Nissan Qashqai er framleiddur. Frá því að framleiðsla hófst þar á annarri kynslóð Qashqai í janúar 2014 rann fimm hundruð þúsundasta eintakið af Qashqai af færibandinu í dag.

Það er framleiðslumet í breskri bílaframleiðslu því aldrei áður hafa verið framleidd svo mörg eintök þar í landi á svo skömmum tíma sem þessum, eða rúmum 20 mánuðum. Qashqai er nú boðinn í 84 löndum vítt og breitt um heim.

Frá því að framleiðsla hófst á annarri kynslóð Qashqai í Sunderland í janúar 2014 hefur nýr bíll komið af færibandinu á sextíu og tveggja sekúndna fresti. Af þeim fjölda hafa um eitt hundrað þúsund eintök (20%) verið seld á mörkuðum í Bretlandi.

Sem dæmi af öðrum helstu mörkuðum á meginlandinu hafa verið seldir rúmlega 68 þúsund bílar af annarri kynslóð Qashqai í Frakklandi, yfir 45 þúsund á Ítalíu og rúmlega 42 þúsund á Spáni eða um 31% sölunnar í heild. Þrátt fyrir að Qashqai hafi fyrst og fremst verið hannaður með þarfir Evrópubúa í huga er bíllin einnig mjög vinsæll á öðrum mörkuðum, ekki síst í ýmsum Afríkuríkjum á borð við Úganda og Zambíu svo einhver séu nefnd.

Nissan Qashqai kom fyrst fram á sjónarsviðið í desember 2006. Síðan þá hafa verið framleidd 2,5 milljónir eintaka. Síðar á þessu ári hefst framleiðsla á bílnum í Pétursborg í Rússlandi sem ætluð er innanlandsmarkaði þar.