Lagerfeld kynnir barnafatalínu

Karl Lagerfeld, sem fagnaði 82 ára afmæli sínu á dögunum, er hvergi nærri hættur. Á miðvikudag frumsýndi hann fyrstu barnafatalínu sína í höfuðstöðvum Karl Lagerfeld í París.

Gestir gæddu sér á sælgæti og sykurpúðum með mynd af Karl sjálfum, á meðan á sýningunni stóð. Eftir hana gátu börnin farið á vinnustofu þar sem þau gátu búið til lyklakyppu með mynd af Lagerfeld eða litað mynd af honum.

Línan er bæði fyrir stráka og stelpur og er nokkuð stór, en í henni verða föt fyrir nýfædd börn upp til 16 ára aldurs. Einnig gerði hann aukahlutalínu þar sem má finna svarta hanska, svart bindi og hárbandið Choupette, sem er nefnt eftir kettinum hans Lagerfeld.

Hluti línunnar kemur í verslanir Melijoe í desember og er svo væntanleg í verslanakeðjur í janúar.