Samtök starfsmanna fjármálafyrirtækja og SA skrifa undir kjarasamning

Samtök starfsmanna fjármálafyrirtækja (SSF) og Samtök atvinnulífsins (SA) skrifuðu í gær undir kjarasamning sem gildir fyrir félagsmenn SSF til ársloka 2018.

Í frétt á vef SFF segir að launahækkanir á samningstímanum fyrir þá sem hafi hafið störf fyrir 1. janúar 2015 og séu enn í starfi við undirritun kjarasamnings séu 16,5 til 22,2 prósent.

„Mest hækkun fyrir þá sem lægri launin hafa í anda þeirrar launastefnu sem stéttarfélög á almennum vinnumarkaði hafa undirritað í sumar. Mikilvæg endurskoðunarákvæði (uppsagnarákvæði) eru jafnframt á árunum 2016, 2017 og 2018 ef forsendur kjarasamninga ganga ekki eftir.

Kjarasamningurinn verður skýrður enn nánar á næstu dögum á heimasíðu SSF og öðrum miðlum SSF. Áætlað er að greiða atkvæði um kjarasamninginn dagana 11. til 16. september.“

Nánar er fjallað um samninginn á vef SFF.