2.000 glænýir Volkswagen bílar fuðruðu upp í kínversku sprengingunni

Stóra sprengingin sem varð í Kína í nótt og leiddi til 44 dauðsfalla skildi eftir sig mikla eyðileggingu og meðal annars fuðruðu upp 1.978 glænýir Volkswagen bílar sem stóðu við höfnina í Tianjin og biðu eftir því að verða fluttir þaðan.

Það voru 1.065 Touareg jeppar, 114 Golf bílar, 391 Bjöllur, 84 up! bílar, 257 Tiguan jepplingar, 28 Passat bílar og 39 Transporter sendibílar sem brunnu allir svo hressilega að þeir verða í besta falli settir í brotajárn.

Á meðfylgjandi mynd má sjá að það er ekki mikið eftir af þessum bílum nema stálið. Það er ekki öfundsvert tryggingafélagið þar sem þessir bílar voru tryggðir, enda tjónið stórvægilegt.