Hagnaður Benz upp um 54%

Það eru bjartir tímar hjá Mercedes Benz þessa dagana og salan aldrei verið meiri. Mercedes Benz greindi frá afkomu annars ársfjórðungs í gær og 54% hagnaðarauka frá fyrra ári. Hagnaður Benz nam 550 milljörðum króna, en var 358 milljarðar í fyrra.

Virði heildarsölu bíla Mercedes Benz jókst um heil 19% á þessum ársfjórðungi. Ljóst er að Mercedes Benz mun skila mjög afkomuríku ári í ár og mikill vöxtur verður bæði í veltu og hagnaði fyrirtækisins í ár. Hagnaður af veltu er nálægt 10% hjá Benz og afkoman því einkar góð og með því hæsta sem gerist í bílabransanum.

Hagnaður af veltu hefur aldrei í sögu Benz verið eins hár og það sem af er ári og því er spáð að hann muni líklega hækka á seinni helmingi ársins. Markmið Benz er að hann verði brátt kominn í 12%.

Það sem helst skýrir góða sölu Mercedes Benz bíla er að fyrirtækið býður nú margar gerðir nýrra bíla en fyrirtækið hefur verið mjög iðið við að kynna nýjar bílgerðir á síðustu misserum og mun halda því áfram á næstunni. Meðal annars er að vænta nýrrar gerðar E-Class bílsins, sem er mikilvægasta eina bílgerð fyrirtækisins.

Einnig mun Mercedes Benz kynna fjórar nýjar gerðir jeppa og jepplinga á árinu og með því auka enn á framboð sitt í þessum vinsælasta flokki bíla um þessar mundir í heiminum. Mercedes Benz tókst það sem t.d. hinum lúxusbílaframleiðendum Þýskalands tókst ekki, þ.e. Audi og BMW, að auka söluna í Kína á öðrum ársfjórðungi, þrátt fyrir minnkandi sölu bíla í Kína.