ASÍ um kjaradeilurnar: „Ábyrgðin liggur hjá Samtökum atvinnulífsins“

Miðstjórn Alþýðusambands Íslands gagnrýnir harðlega þá afstöðu Samtaka atvinnulífsins að neita að ræða kröfugerð verkalýðshreyfingarinnar í kjaradeilunni sem nú er uppi.

Í ályktun frá sambandinu segir að afneitun af þessu tagi beri vott um takmörkuð veruleikatengsl og herði aðeins hnútinn sem að þarf að leysa. „Afstaða atvinnurekenda er ögrandi og skaðar það traust sem þarf að ríkja á milli aðila sem verða að ná samningum. Verkefnið fer ekkert, það verður bara erfiðara viðfangs.

Miðstjórn ASÍ vísar því ábyrgð á stöðu mála í kjaradeilunum alfarið á hendur SA. Komi til víðtækra verkfalla á almennum vinnumarkaði síðar í mánuðinum er það á ábyrgð samtaka atvinnurekenda.“