Færeyingar kynna nýtt olíuleitarútboð

„Við vitum að olíu er að finna á færeyska landgrunninu og að fleiri af okkar svæðum eru mjög áhugaverð fyrir olíufélög að kanna nánar,“ sagði Johan Dahl, atvinnumálaráðherra Færeyja, þegar hann skýrði frá því að næsta olíuleitarútboð Færeyinga yrði árið 2017, eftir tvö ár. Áformin voru kynnt í Norðurlandahúsinu í Þórshöfn í síðustu viku á ráðstefnu sem fjallaði um þær áskoranir að leita olíu í gegnum basalt-hraunlög á hafsbotni.

Johan Dahl sagði að mörgum kynni að þykja það óvænt tíðindi að bjóða út olíuleit, eins og staðan væri á olíumörkuðum heims. En ástandið myndi batna með tímanum.

Þetta verður fjórða útboð Færeyinga frá því olíuleit hófst við eyjarnar fyrir fimmtán árum. Þótt ekki hafi enn tekist að finna olíulind í vinnanlegu magni hefur leitin þó skilað þeim árangri að staðfest hefur verið að olía er við Færeyjar. Alls hafa níu brunnar verið boraðir, síðast tveir á vegum Statoil í fyrrasumar, en þeir reyndust báðir þurrir.

Sú niðurstaða reyndist vonbrigði enda hafði Statoil varið tugum milljarða króna til leitarinnar. Statoil skilaði í framhaldinu inn þremur leitarleyfum en heldur einu eftir. Aðrir sérleyfishafar í færeysku lögsögunni eru danska félagið DONG og austurríska félagið OMV.

Færeyskir ráðamenn minna reglulega á að olíuleit sé þolinmæðisverk, að jafnaði séu tíu holur boraðar fyrir hverja eina sem hittir á olíulind. Þá hafi þurft að bora 38 brunna við Noregsstrendur áður en Ekofisk-olíulindin fannst loks á aðfangadag árið 1969, sem reyndist upphaf norska olíuævintýrisins. Ennfremur séu nú þegar fundnar miklar olíulindir Bretlandsmegin skammt frá færeysku lögsögumörkunum.

Þótt engin olíulind hafi enn fundist við Færeyjar hefur olíuleitin leitt til þess að Færeyingar hafa byggt upp umtalsverða þjónustustarfsemi í kringum olíuiðnað, en þar njóta þeir nálægðar við borpallana í Norðursjó og Noregshafi. Þess er skemmst að minnast að einn stærsti borpallur heims var síðastliðið haust í viðamikilli klössun í þjónustumiðstöðinni í Rúnavík.

Þá hafa færeyskar útgerðir byggt upp stóran flota sérhæfðra olíuþjónustuskipa. Frétt um nýjasta stolt Færeyinga í þeim efnum má sjá hér á oljan.fo.