Coca Cola hættir við auglýsingaherferð eftir að hafa vitnað í Mein Kampf

Coca Cola hefur hætt auglýsingaherferð  sinni á Twitter undir nafninu „Make it Happy“. Fyrirtækið dró auglýsingaherferðina til baka eftir að bandaríski vefmiðillinn Gawker fékk Coca Cola til að birta upphaf bókarinnar Mein Kampf eftir Adolf Hitler.

Auglýsingaherferð  Coca Cola, sem upphaflega var kynnt á meðan Super Bowl  stóð yfir, fólst í að fólk var beðið að svara neikvæðum tístum með #MakeItHappy. Þá svaraði sjálfvirkur aðgangur Coca Cola með því að birta upphaflegu tístin undir krúttlegum myndum. Til að mynda af sætum músum, pálmatrjám með sólgleraugu eða kjúklingum með trommukjuða og kúrekahatt segir í frétt The Guardian.



Markmið herferðarinnar var að berjast gegn neikvæðni á samfélagsmiðlum sem og annars staðar á internetinu sagði í yfirlýsingu frá Coca Cola.

Gawker bjó til aðgang á Twitter undir nafninu @MeinCoke sem birti sjálfvirkt setningar úr Mein Kampf. Í kjölfarið voru send út tíst merkt #MakeItHappy sem gerði það að verkum að Coca Cola birti setningar úr Mein Kampf sjálfvirkt með krúttlegum myndum.

Coca Cola tók að lokum auglýsingaherferðina úr birtingu eftir að hafa birt talsverðan hluta Mein Kampf.