Opel Corsavan

Sá bíll sem nú er nýjastur í flota Opel verður einnig í boði sem agnarsmá sendibíll, en Opel kynnti þennan bíl um síðustu helgi á bílasýningu í Brussel.

Þessi bíll er ekki eini smái fólksbíllinn sem í boði er sem sendibíll því Ford Fiesta má einnig fá í samskonar útfærslu. Flestir sendibílar eru bílar af stærri gerðinni en bæði Opel og Ford telja þörf fyrir slíka bíla sem eyða litlu og krefjast ekki mikils farangursrýmis.

Engin afturrúða er í Opel Corsavan, sem eðlilegt má teljast fyrir sendibíl og að sjálfsögðu eru ekki aftursæti í bílnum heldur er rýmið ætlað eingöngu fyrir farangur. Gólfið afturí er flatt en afturrýmið er búið allskonar festingum, krókum og netum svo farangurinn hafi hægt um sig á ferð um göturnar. Þar er einnig myndarleg gúmmímotta til að draga úr hávaða frá frangrinum.

Flutningsgeta bílsins er 570 kíló svo fyrir vikið má hlaða bílinn myndarlega þrátt fyrir hve smár hann er. Ef til vill er þarna kominn afar hentugur og eyðslugrannur sendibíll til smærri verka sem hentar stórum hópi kaupenda.