Lítill púki í Gaupa | Myndband

Undirbúningi íslenska landsliðsins fyrir HM í Katar er lokið og á morgun heldur liðið til Doha.

Það voru mikil batamerki á leik íslenska liðsins um síðustu helgi er það mætti Svíum, Dönum og Slóvenum. Tap gegn Svíum, frábær sigur á Dönum og svo jafntefli gegn Slóvenum.

Í kjölfarið skar landsliðsþjálfarinn hópinn sinn niður úr 20 í 17 sem fara til Katar.

„Ég get ekki sagt annað en að Aron hafi valið rétt að þessu sinni. Auðvitað setja menn spurningamerki við Rúnar Kárason en hann sýndi gegn Þjóðverjum og Svíum að hann er ekki alveg tilbúinn í slaginn. Hann mun koma til baka en mér fannst hann ekki í sakk búinn til þess að taka þátt að þessu sinni," segir Gaupi.

Gaupi er eðlilega ánægður með framfarirnar sem liðið sýndi um helgina en hefur nokkrar áhyggjur af varnarleiknum.

„Leikirnir gegn Dönum og Slóvenum voru mjög góðir. Það var mikil breyting á liðinu frá leikjunum gegn Þjóðverjum. Sóknarleikurinn var mun betri sem skýrist á því að Aron Pálmarsson kom inn. Hann bætir okkar lið um 20 prósent. Gríðarlega mikilvægur leikmaður enda einn sá besti í heiminum í dag. Það getur ekkert lið verið án svona manns.

„Við fundum línuna mjög vel og Róbert ógnarsterkur. Varnarleikurinn var köflóttur. Náðum góðum köflum og á því þarf að byggja. Hins vegar er ljóst að við þurfum betri markvörslu en við fengum í þessum leikjum. Ég er bjartsýnn á að liðið muni spjara sig á heimsmeistaramótinu.

„Eitt sem mér fannst athyglisvert er að þjálfarateymið hafði greinilega undirbúið sitt lið gríðarlega vel. Lesið vel í andstæðinginn. Þeir voru óhræddir við að prufa hluti og skipta mönnum inn á.

„Jákvæðasti punkturinn er kannski sá að þarna spiluðum við án Guðjóns Vals sem ég held eftir á að hyggja að sé gríðarlegur plús vegna þess að Stefán Rafn stóð sig ótrúlega vel. Þarna er kominn maður sem getur leyst Guðjón Val af."

Nýja 3/2/1 vörnin gekk ekki vel gegn Þjóðverjum en allt annað var að sjá hana í nýliðnum leikjum.

„Þetta er júgóslavnesk vörn. Hún virkaði mjög vel og sérstaklega gegn Slóvenum. Það tekur tíma að slípa þessa vörn og hún gæti orðið sterkt vopn. Til að mynda gegn Svíum."

Guðjón segir að íslenska liðið hafi staðist prófið í undirbúningsleikjunum.

„Liðið er í mikilli framför og við ættum að geta komist í sextán liða úrslit. Síðan er það spurningin hvaða andstæðing við fáum á leiðinni. Ég er ekki smeykur við það. Við getum unnið alla og tapað fyrir öllum í svona leikjum. Það er einhver lítill púki í mér sem segir mér að einhvers staðar á leiðinni munum við aftur spila við Dani."

Viðtalið við Gaupa má sjá í heild sinni hér að neðan.