Sigið nú 40 metrar

Mælir í öskju Bárðarbungu sýnir að sigið í fjallinu heldur áfram með svipuðum hraða og verið hefur undanfarnar vikur. Mælingar úr lofti sýna að heildarsigið var orðið 40 metrar á föstudag.

Mengunarmælar sýndu að styrkur brennisteinsdíoxíðs (SO2) var 1.800 míkrógrömm á rúmmetra á Höfn í Hornafirði og í Skaftafelli. Samkvæmt upplýsingum frá Veðurstofu Íslands má gera ráð fyrir mikilli mengun á svæðinu í dag og fram á kvöld.

Fólk með undirliggjandi öndunarfærasjúkdóma er hvatt til þess að hafa sérstakar gætur á líðan sinni og hafa strax samband við lækni ef það finnur fyrir óþægindum.