Yfir 1.100 erlendir gestir staðfestir

„Við vorum að taka það saman fyrir stuttu og þá voru um 1.100 erlendir gestir búnir að kaupa sér miða á hátíðina,“ segir Tómas Young, forsprakki ATP-tónlistarhátíðarinnar hér á landi.

„Það er gríðarleg fjölgun frá því í fyrra en þá voru þetta rúmlega 200 gestir að utan sem keyptu sér miða en þá fórum við líka miklu seinna af stað með söluna á hátíðina.“

ATP, sem fram fer 10.-12. júlí, er mjög virt hátíð og á marga harða aðdáendur sem fylgja hátíðinni út um allan heim.

Öll gisting á Ásbrú, þar sem hátíðin fer fram, og í Reykjanesbæ er svo gott sem uppseld dagana sem hátíðin er haldin. „Stærstu hótelin eiga einhver laus herbergi en öll önnur gisting hefur verið uppbókuð í þó nokkurn tíma,“ segir Tómas. Í ljósi þessa gistir stór hluti erlendra gesta á höfuðborgarsvæðinu.

Hljómsveitin Portishead verður stærsta nafnið á föstudeginum og Interpol stærsta nafnið á laugardeginum en fjöldi þekktra listamanna koma fram á hátíðnni í ár.