Audi Q7 með 23 hátalara hljóðkerfi

Það verður ekki slorlegt hljóðkerfið í nýrri kynslóð Audi Q7 jeppans sem kynntur verður á bílasýningunni í Detroit í næsta mánuði. Í bílnum er Bang & Olufsen kerfi með 23 hátölurum og er heildarafl þess 1.920 wött.

Sagt er að þetta kerfi gefi hlustandanum þrívíða upplifun og engu líkara sé að hann sé staddur með flytjendum þeirrar tónlistar sem hlustað er á. Sem dæmi eru fjórir hátalarar í mismunandi hæð í fremsta burðarbita bílsins (A-pillar).

Hljóðkerfið lagar sig einnig að innanrými bílsins og breytist eftir því hve margir eru í bílnum hverju sinni og líkir eftir því rými sem hljóðupptakan fór fram í upphaflega. Hljóðið kemur frá 11 rásum.

Þetta hljóðkerfi Bang & Olufsen verður í framhaldinu einnig í boði í fleiri bílgerðum Audi og í minni gerðum verður það minna í sniðum og með 20 hátalara.