Nafnið er Karl

Frá Opel berast þær fréttir að næsta sumar verði formlega kynnt til sögunnar nýtt nafn í flokki smábíla. Og nafnið er Karl. Opel leitaði ekki langt yfir skammt því nafnið er í höfuðið á syni stofnanda fyrirtækisins.

Miðað við lýsingarnar liggur mikill metnaður að baki hönnun bílsins og fylgir sögunni að í þessum nýja meðlim Opel fjölskyldunnar sé að finna öll þau þægindi sem teljast þau framsæknustu í dag. Opel hafði það strax sem markmið við hönnun Karl að hann ætti að kosta minna en 10.000 evrur og mun það standa.

Karl mun sóma sér vel við hliðina á, annars vegar Opel Adam og svo Opel Corsa, sem kemur nýr á markaðinn strax eftir áramót. Þeir munu saman fullkomna flotta línu í smábílum sem í boði verður frá Opel frá og með sumrinu 2015. Bílabúð Benna mun kynna Opel Karl þegar hann kemur á markað.