Gerðu meir, Ásgeir

Ásgeir Örn Valgerðarson ætlar næsta árið að leggja upp í ýmiskonar ferðalög hér á landi, en áfangastaðina ákveða áhugasamir verðandi Íslandsfarar úti í heimi.

Verkefnið kallar hann Do More Ásgeir, sem mætti snara yfir á íslensku sem Gerðu meir, Ásgeir.

“Do More Ásgeir er í raun bara hugmynd sem spratt upp hjá mér eftir að ég fór að leiða hugann að því hvað ég hef ferðast lítið á Íslandi. Við Íslendingar erum upp til hópa mjög dugleg að ferðast til útlanda og fyrir mitt leyti er ég ekki nógu duglegur að skoða mitt eigið land,” segir Ásgeir Örn.

Ásgeir stofnaði YouTube-síðu þar sem hann deilir ferðasögum sínum í formi myndbanda. Og val á viðfangsefnum er ekki alfarið í hans höndum.

“Þú sem ferðamaður sem villt koma til Íslands og upplifa eitthvað hér getur kastað á mig beiðnum og ég get í kjölfarið farið á staðinn og skilað minni ferðaupplifun í myndbandi,” segir Ásgeir, sem samsinnir að um nútímalega ferðaþjónustu sé að ræða.

“Það var einn sem kom með mjög skemmtilega hugmynd, að ég myndi fara á snjóbretti niður ösku á eldfjalli.”

Þó verkefnið sé nýfarið af stað hefur það þegar vakið talsverða athygli.

“Það kom alveg á óvart, að bæði Íslendingar og útlendingar eru að sýna þessu talsvert mikla athygli.

Ásgeir er búinn að labba Laugarveginn og inn í jökulgil. Næst á dagskrá er svo Iceland Airwaves, samkvæmt óskum að utan.

“Ég hafði aldrei gengið Laugarveginn áður og aldrei komið inn í Landmannalaugar. Nú er ég hinsvegar búin að koma inn í Landmannalaugar tvisvar á undanförnum mánuðum svo þetta er strax farið að skila sér.”

Ásgeir gerir þetta alfarið á eigin vegum og var fyrst og fremst hugsað sem hvatning fyrir hann sjálfan til að ferðast meira. Hann segir þó að innlendir aðilar í ferðaþjónustu hafi haft samband við sig og boðið sér með í ferðir ef hann vilji, þeirra á meðal Arctic Adventures. Slíkum tilboðum tekur Ásgeir að sjálfsögðu fagnandi.