Innlent

Gosið gæti haldið áfram mánuðum saman

Lillý Valgerður Pétursdóttir skrifar
Gosið í Holuhrauni er enn mjög öflugt og engin merki um að því sé að ljúka. Jarðeðlisfræðingur segir það jafnvel geta staðið mánuðum saman og á meðan haldi íbúar áfram að finna fyrir menguninni.

Nú þegar sex vikur eru frá því að gosið hófst er enn mikil virkni á svæðinu. Á meðfylgjandi myndskeiði, sem Gísli Matthías Gíslason, flugmaður Norðurflugs, tók, má sjá hvernig gígurinn er orðinn samfelldur. Ólgandi hrauntjörn er í gígnum þaðan sem hraunið rennur.

Þá má sjá á myndunum þykkt ský fyrir ofan gíginn en það er gasið sem sleppur út. Þetta gas er sú gosmengun sem íbúar hafa víða fundið vel fyrir.

Magnús Tumi Guðmundsson jarðeðlisfræðingur flaug með flugvél Landhelgisgæslunnar yfir svæðið í gær. Hann segir gosið enn mjög öflugt og ekki að sjá að það sé farið að draga úr því. Bárðarbunga haldi áfram að síga og á meðan að svo sé þá er ekki við því að búast að þetta gos hætti.

Þá segir hann gosið geta varað lengi og jafnvel mánuðum saman. Á meðan að svo sé þá haldi mengun frá gosstöðvunum áfram að berast yfir landið og íbúar að finna fyrir henni. 

Bárðarbunga

Tengdar fréttir

Bárðarbunga gæti tæmt sig á sólarhring

Stærsta mögulega sprengigosið í Bárðarbungu myndi aldrei standa nema í einn til tvo sólarhringa. Þótt það virðist ólíklegt verður að reikna með því versta, segir eldfjallafræðingur. Fólk á ekki að vera í hættu, enda er fjallið langt frá byggðu bóli.

Gosmökkurinn stefnir í vestur og suðvestur í dag

Búast má við að gasmengun frá eldgosinu í Holuhrauni berist í vestur og suðvestur frá gosstöðvunum allt að Snæfellsnesi í norðri og Reykjanesi í suðri og því gæti mengunar aftur orðið vart á höfuðborgarsvæðinu, annan daginn í röð.

Rauð sólarupprás

Vegna mengunar frá gosinu í Holuhrauni virtist sólin vera rauð þegar hún kom yfir sjóndeildarhringinn í morgun.

Eldarnir dragi nafn sitt af nornahárinu

Þorvaldur Þórðarson, eldfjallafræðingur, gerir það að tillögu sinni að umbrotin í Holuhrauni dragi nafn sitt af svokölluðu nornahári, fyrirbæri sem mikið fer fyrir við eldstöðina. Fái tillagan hljómgrunn gæti nafnið Nornaeldar öðlast þegnrétt.

Grunnvatn gæti sagt fyrir um jarðskjálfta

Rannsóknir á grunnvatni benda til að efnabreytingar í því geti haft forspárgildi um stóra jarðskjálfta. Gæti nýst vel með öðrum rannsóknum sem lúta að því sama. Vísindamenn rannsaka gögnin nú í samhengi við eldgosið í Holuhrauni.

Gígurinn Baugur er þegar 100 metra hár

Gígaröðin í Holuhrauni teygir sig nú upp í 100 metra hæð þar sem hún er hæst. Hraunið stíflar Jökulsá og lón myndast, en mjög hefur dregið úr kvikuuppstreymi.

Mest lesið


Fleiri fréttir

Sjá meira


×

Mest lesið