Formaður SA segir aukin fjárútlát samkvæmt fjárlögum vonbrigði

Þorsteinn Víglundsson, framkvæmdastjóri Samtaka Atvinnulífsins, segir vonbrigði að nýtt fjárlagafrumvarp boði aukin fjárútlát hjá ríkinu. Niðurgreiðsla skulda ríkisins sé mikilvægasta velferðarmál þjóðarinnar.

Þorsteinn var gestur á Sprengisandi á Bylgjunni í morgun þar sem nýtt fjárlagafrumvarp var meðal annars til umræðu. Þorsteinn sagði margt jákvætt í frumvarpi ríkisstjórnarinnar en eitt og annað mætti setja út á.

„Það sem veldur okkur mestum vonbrigðum er skortur á aðhaldi í frumvarpinu,“ segir Þorsteinn. „Við sjáum það að heildarútgjöld eru byrjuð að aukast aftur, það er tæplega þrjátíu milljarða króna aukning á milli ára. Við óttumst þetta, því niðurgreiðsla skulda ríkisjóðs eftir efnahagshrunið er eitt brýnasta velferðarmálið í dag.“

Þorsteinn segist sáttur með boðar breytingar á skattkerfinu og ekki sé rétt að tala um að verið sé að færa byrðarnar af þeim tekjuhærri og á þá tekjulægri.

„Ég held að það sé mikilvægt að það komi fram að ríkisstjórnin sem kom auðlegðarskattinum á ætlaði honum alltaf að vera tímabundinn,“ segir Þorsteinn. „Þannig að það er í sjálfu sér ekki verið að gera annað en að leyfa þeim áformum að verða að veruleika.“

Viðtalið við Þorstein í heild sinni má heyra í spilaranum hér fyrir ofan.