Mazdaspeed2 á teikniborðinu

Kraftaútgáfa af hinum smávaxna Mazda2 er í þróun hjá Mazda en fjórða kynslóð Mazda2 bílsins kemur á markað nú í haust. Líkt og með aðrar kraftagerðir Mazda bíla fær hann viðbótina „speed“ í heiti sitt.

Þessi bíll fellur í flokk með mörgum álitlegum smáum spyrnukerrum. Þar á meðal eru bílar eins og Ford Fiesta ST, Volkswagen Polo GTI, Renault Clio RS 200, Mini Cooper S, Fiat 500 Abarth  og Seat Ibiza Cupra. Því er þröng á þingi er kemur að þessari gerð bíla, en Mazda ætlar engu að síður ekki að eftirláta ofantöldum bílum um sviðið.

Mazda hefur gengið mjög vel að selja bíla sína undanfarið og hafa nýir bílar þeirra fengið frábærar móttökur þeirra sem fjalla um bíla, sem og meðal bílkaupenda. Mazdaspeed2 gæti fengið sömu vél og verður í Mazda MX-5 Miata, þ.e. fremur smáa vél með forþjöppu sem kreistir út um 200 hestöflum.