Apple teygir sig á fyrirtækjamarkaðinn með IBM

Apple tölvufyrirtækið hefur hingað til ekki verið þekkt fyrir að höfða mikið til viðskiptalífsins heldur hefur það einbeitt sér að almennum neytendum og þjónað þeirra kröfum.

Nú bregður svo við að Apple hefur hafið samstarf við IBM um tölvulausnir fyrir viðskiptalífið. Samstarfið felst í því að IBM útvegar nauðsynleg gögn og greiningartæki en Apple sér um viðmót og skilvirkni sem notendur geta skoðað á iPhone símum eða iPad tölvum.

Þetta samstarf IBM og Apple hefur fengið nafnið IBM MobileFirst for iOS. Þessa lausn ætlar IBM að bjóða fyrirtækjum um allan heim og selja iPhone og iPad tæki sem part af henni. Markar það ákveðin tímamót að IBM selji vörur frá Apple sem hluta af sínum lausnum.

IBM hefur látið þau orð falla að iPhone og iPad séu bestu tækin til þess arna og séu notuð af 98% þeirra fyrirtækja sem fylla Fortune 500 listann yfir stærstu fyrirtæki Bandaríkjanna og Global 500 listann yfir stærstu fyrirtæki heims. Því sé rakið að bjóða lausnir sem samhæfðar séu þessum tækjum.

Þessi lausn færir Apple algerlegan nýjan markað og aukinn kaupendahóp og bæði fyrirtækin munu hafa mikinn hagnað af því.