Le Mans þolaksturinn á morgun

Á morgun hefst í 82. sinn hinn þekkti kappakstur í Le Mans í Frakklandi. Hann hefur þá sérstöðu að standa í 24 klukkustundir og því reynir mjög á á ökumenn og bíla og ekið í myrkri dágóðan hluta keppninnar.

Bílar frá Audi hafa á undanförnum árum drottnað í kappakstrinum en útlit er fyrir að það gæti breyst að þessu sinni. Á æfingum fyrir keppnina hafa bílar frá Toyota og Porsche náð að skáka Audi bílunum. Það verður bíll frá Toyota sem ræsir fremstur á morgun en japanskur ökumaður hans, Kazuki Nakajama, náði besta tímanum á hinni 13 kílómetra langri braut.

Það er einnig Toyota bíll sem ræsir þriðji, en á milli þeirra er svo bíll frá Porsche, en Porsche sendir nú loks lið í keppnina eftir 16 ára fjarveru. Svo til engu munaði á Porsche bílnum í öðru sætinu og Toyota bílsins í því fyrsta, eða aðeins 0,357 sekúndum. Tími Toyota bílsins sem fremstur verður á morgun var 3:21,789 mínúta. Audi bílarnir ræsa á morgun í fimmta, sjötta og sjöunda sæti.

Audi varð fyrir áfalli á æfingum í gær þegar Loic Duval ók einum þriggja bíla þeirra í spað, en sem betur fer slapp hann sjálfur án teljandi meiðsla. Læknar hafa þó bannað honum að taka þátt í akstrinum á morgun og mun annar ökumaður leysa hann af hólmi.