Viðar skoraði og lagði upp í sigri Vålerenga

Viðar Örn Kjartansson var enn og aftur á skotskónum þegar Vålerenga sótti Brann heim í norsku úrvalsdeildinni í fótbolta í dag.

Varnarmaðurinn Jonas Grønner, sem lék með KR seinni hluta sumars í fyrra, kom Brann yfir á 31. mínútu, en Nicolai Høgh jafnaði metin þremur mínútum síðar.

Viðar kom Vålerenga yfir með skallamarki eftir tveggja mínútna leik í seinni hálfleik. og Selfyssingurinn lagði svo upp þriðja mark Vålerenga fyrir Herman Stengel á 73. mínútu, en Hakon Lorentzen minnkaði muninn fyrir Brann fimm mínútum seinna.

Fleiri urðu mörkin ekki, en með sigrinum komst Vålerenga upp í 4. sæti deildarinnar. Viðar er markahæstur í deildinni með 11 mörk í jafnmörgum leikjum.

Birkir Már Sævarsson lék allan leikinn fyrir Brann sem situr í 14. sæti með átta stig.