Fyrirliðinn og varnarjaxlinn framlengja

Ásta Birna Gunnarsdóttir, fyrirliði Fram í Olís-deild kvenna í handbolta, og SteinunnBjörnsdóttir, besti varnarmaður liðsins, hafa framlengt samninga sína við félagið.

Þetta kemur fram í fréttatilkynningu frá Safamýrarliðinu en ekki er tekið fram hversu langir nýju samningarnir eru.

Leikmennirnir tveir voru báðir mikið meiddir í vetur en Ásta Birna sleit krossband. Þær verða báðar til í slaginn þegar Olís-deildin hefst aftur næsta haust en Íslandsmeistararnir eru úr leik í ár.

Báðar eru þær landsliðskonur en Ásta Birna á að baki 82 landsleiki og Steinunn 14 landsleiki.  Saman eiga þær um 400 leiki fyrir Fram og því gífurleg reynsla sem Framarar halda í liðinu og geta byggt á í kringum yngri og efnilegri leikmenn.