Wilbek: Gerðum allt hvað við gátum

„Við mættum frönsku liði sem gerði engin mistök. Við gátum ekki haldið í við það. Við vorum ekki nógu hugrakkir í byrjun og fórum illa með mörg færi,“ sagði Ulrik Wilbek þjálfari Danmerkur eftir tapið í úrslitaleik Evrópumeistaramótisins í handbolta í dag.

„Við gátum ekki unnið upp forskotið sem þeir náðu. Við höfðum engin svör við þeirra leik.

„Þeir voru of fljótir fyrir okkur og við vorum of hægir á fótunum. Við vorum of ragir og það var ekki uppleggið.

„Það er synd að tapa en þetta er ekki eins og gegn Spáni fyrir ári síðan. Við gerðum allt hvað við gátum og skoruðum mörg góð mörk en við fengum engin stopp í vörninni,“ sagði hinn sigursæli þjálfari Danmerkur sem nú er hættur með liðið.