Íslenskar endurskinshúfur fyrir krakkana frá Tulipop

Tulipop-teymið Signý Kolbeinsdóttir og Helga Árnadóttir hanna litríkar endurskinshúfur fyrir VÍS en húfurnar hafa verið mjög vinsælar hjá krökkunum. 

„Við höfum verið að hanna og framleiða litríkar endurskinshúfur fyrir skóla- og leikskólakrakka fyrir VÍS síðastliðin þrjú ár. VÍS hefur svo verið að gefa viðskiptavinum sínum húfur fyrir börnin og það hafa hreinlega verið biðraðir út úr dyrum í útibúum um allt land,“ segir Helga Árnadóttir sem rekur Tulipop ásamt Signýju Kolbeinsdóttur hönnuði.

Saman stofnuðu þær Tulipop fyrir þremur árum og eru búnar að skapa ævintýraheim með litríkum karakterum sem þær nota til að skreyta ýmsar skemmtilegar gjafavörur fyrir börn á öllum aldri. „Signý settist niður með markaðsdeild VÍS og fékk hugmynd að þessari snilldarhúfu með öryggisatriðin að leiðarljósi og okkur fannst þetta svo skemmtilegt verkefni.“

Tulipop býður upp á breiða gjafavörulínu fyrir börn sem inniheldur minnisbækur, ritfangalínu, borðbúnaðarlínu, lampa, pennaveski, lyklakippur og fleira. Fótfesta fyrirtækisins er á Íslandi þrátt fyrir að þær selji til 50 verslana í átta löndum. Vörurnar fást í 15 verslunum á Íslandi, meðal annars í Epal, Dúku og Hrím. Heimasíða Tulipop er www.tulipop.is.