Allir byrjuðu með ágætum nema Woodgate | Úttekt

Gareth Bale skoraði í sínum fyrsta leik með Real Madrid um helgina í 2-2 jafntefli gegn Villarreal á útivelli. Frammistaða dýrasta knattspyrnumanns í heimi þótt heilt yfir ekki sérstök.

Bale er sjötti breski leikmaðurinn til þess að spila með spænska stórliðinu en fimm Englendingar hafa áður haldið á vit ævintýranna í spænsku höfuðborginni. Allir byrjuðu með ágætum nema einn.

Hér að neðan má sjá umfjöllun um Bretana sex sem klæðst hafa fræga hvíta búningnum. Fimm eru Englendingar auk Walesverjans Bale.

Laurie Cunningham



Kaupverð: 950 þúsund pund sumarið 1979.

Enski kantmaðurinn var keyptur frá West Brom og var fyrsti Bretinn á mála hjá Real. Cunningham var fyrsti þeldökki landsliðsmaður Englands.

Fyrsti leikur: Cunningham skoraði tvö mörk og lagði upp það þriðja í 3-1 sigri á Valencia. Átti erfitt með að festa sig í sessi á fjórum árum hjá Real. Lét lífið fyrir aldur fram í bílslysi árið 1989.

Steve McManaman



Kaupverð: Fór á frjálsri sölu frá Liverpool sumarið 1999.

Félagaskipti McManaman voru umdeild þar sem hann hafði neitað að framlengja samning sinn við Liverpool.

Fyrsti leikur: Lagði upp sigurmark í viðbótartíma í 2-1 sigri gegn Mallorca. Varð fyrsti Englendingurinn til að vinna Meistaradeildina með liði utan Evrópu og sá fyrsti til að vinna keppnina tvisvar. Starfar í dag í sjónvarpi.

David Beckham

Kaupverð: 35 milljónir punda sumarið 2003.

Beckham gekk í raðir Real Madrid frá Manchester United þrátt fyrir miklar vangaveltur um að Barcelona yrði áfangastaður hans.

Fyrsti leikur: Það tók Beckham aðeins þrjár mínútur að opna markareikning sinn hjá Real í 3-0 sigri á Mallorca í Ofurbikarnum. Beckham féll í ónáð hjá Fabio Capello en vann sig aftur inn í liðið sem hlaut spænska titilinn vorið 2007. Hélt í kjölfarið til L.A. Galaxy í Bandaríkjunum.

Michael Owen

Kaupverð: 8 milljónir punda sumarið 2004.

Owen var markahæsti leikmaður Liverpool sjö tímabil í röð áður en hann hélt til Spánar. Var valinn knattspyrnumaður ársins í Evrópu árið 2001.

Fyrsti leikur: Owen kom inn á sem varamaður og lagði upp mark fyrir Ronaldo í 1-0 sigri á Mallorca. Owen skoraði þrettán mörk sitt eina tímabil með Real. Í kjölfarið flakkaði hann frá Newcastle til Manchester United áður en hann lagði skóna á hilluna sem leikmaður Stoke í vor.

Jonathan Woodgate

Kaupverð: 13 milljónir punda sumarið 2004.

Kaupin á Woodgate komu töluvert á óvart enda hafði hann langa meiðslasögu að baki. Hann var meiddur við komuna til Madrídar og spilaði ekkert fyrstu leiktíðina.

Fyrsti leikur: Woodgate skoraði sjálfsmark og var rekinn af velli með sitt annað gula spjald um miðjan síðari hálfleik í 3-1 sigri Real á Athletic Bilbao. „Þetta var ekki hin fullkomna byrjun,“ sagði Woodgate eftir leikinn. Spilar í dag með Middlesbrough í Championship-deildinni.

Gareth Bale

Kaupverð: 86 milljónir punda í ágúst.

Marga rak í rogastans þegar Wales-maðurinn var seldur fyrir hæstu upphæð sögunnar til Real Madrid eftir langar samningaviðræður Real Madrid við Tottenham.

Fyrsti leikur: Gareth Bale opnaði markareikning sinn í 2-2 jafntefli gegn Villarreal á útivelli á laugardagskvöldið. Wales-maðurinn átti þó engan stjörnuleik en létti vafalítið pressunni á sér með markinu. Ballið er rétt að byrja hjá Bale.