Úrval heilsurétta og fæðubótarefna

Sanitas er ung og framsækin heilsu- og matvöruheildsala, stofnuð árið 2010. Fyrirtækið flytur meðal annars inn Nutramino-vörurnar frá Danmörku, en þær er að finna í allflestum matvöruverslunum landsins. "Þetta eru fæðubótarefni, íþróttadrykkir, prótínstangir og margt fleira, en Nutramino er risinn á sínu sviði í Danmörku. Velgengnin byggir fyrst og fremst á því að notuð eru úrvalshráefni og vinna Danir eftir strangasta regluverki í heimi hvað fæðubótarefni snertir,“ segir Friðfinnur Magnússon, framkvæmdastjóri Sanitas. Nýjasta vara fyrirtækisins er taílenskur skyndibiti frá danska vörumerkinu Kitchen Joy. Réttirnir eru framleiddir í Taílandi undir ströngu gæðaeftirliti Evrópusambandsins og hafa slegið rækilega í gegn í Danmörku, Noregi og Svíþjóð. Þeir eru flestir sykur- og glútenlausir og upplagt er að eiga þá í frystinum til að geta útbúið hollan og góðan mat á augabragði. "Við verðum með níu gerðir og ég er ekki í nokkrum vafa um að þeir eigi eftir að falla í kramið hjá Íslendingum, en þeir koma í verslanir á allra næstu dögum.“ Friðfinnur hvetur áhugasama til að skoða heimasíðu fyrirtækisins, sanitaheildverslun.is, en þar er að finna yfirlit yfir allar vörur. "Við erum stolt af vöruúrvalinu og viljum láta gott af okkur leiða með góðum vörum.“