Saklaus úthrópaður sem svikari af Bland.is

Forsvarsmenn Bland.is höfðu mann fyrir rangri sök þegar þeir nafngreindu hann og sökuðu um að svíkja fé af heiðvirðu fólki.

Fram kom á Vísi í lok nóvember að Bland.is hefði sent viðvörun á alla notendur síðunnar þar sem varað var við þremur mönnum sem eru með reikninga á síðunni. Þeir hafi ítrekað reynt að svíkja út fé af fólki. Í póstinum frá Bland.is voru mennirnir þrír nafngreindir. Nú hefur komið í ljós að Bland.is hafði einn mannana fyrir rangri sök.

„Nafn hans var ítrekað misnotað í tilraunum til slíkra svika án hans vitneskju,“ segir í tilkynningu frá Bland.is. „Okkur þykir því bæði rétt og skylt að biðja hann velvirðingar á mistökunum þar sem hann var hafður fyrir rangri sök þar sem nafn hans var misnotað í slíkum tilraunum. Hafa skal það er sannara reynist og er þessu því hér með komið á framfæri.“

Ekki náðist í forsvarsmenn Bland.is við vinnslu fréttarinnar.