Tíu Jólastjörnur í úrslit

Leitin að Jólastjörnunni 2013 er í fullum gangi og í gær hittu tíu stúlkur dómnefndina í úrslitaprufum. Af þessum tíu mun ein standa uppi sem sigurvegari og hreppa titilinn Jólastjarnan 2013. 

Jólastjarnan er söngkeppni fyrir krakka 16 ára og yngri, en þetta er í þriðja sinn sem keppnin er haldin og er þátttakan stigvaxandi ár hvert. Alls tóku tæplega 500 ungmenni þátt í Jólastjörnunni í ár en þessar tíu stúlkur voru boðaðar í úrslit. Stúlkurnar eru á aldrinum 10-15 ára og heita Andrea,  Agla Bríet, Birta, Nína Dögg, Sara Renee, Eik, Kolfreyja Sól, Veronika Heba, Diljá og Klara Sól.

Sigurvegarinn mun stíga á svið á stórtónleikunum Jólagestir Björgvins í Laugardalshöllinni þann 14. desember næstkomandi. Hægt verður að fylgjast nánar með prufunum í Íslandi í dag á Stöð 2 á næstunni þegar sigurvegarinn veður kynntur. 



Nánari upplýsingar um jólagesti má finna á jolagestir.is



Meðfylgjandi myndir voru teknar af Gunnari Ásgeirssyni.